Мото настан со фокус на машкото здравје. Викенд исполнет со забава и едукација во Скопје Сити Мол.
Викендот, на 2 и 3 ноември, Здружението на граѓани за промоција на мото културата и безбедноста во сообраќајот, Бајкерс Гараж, во соработка со Скопје Сити Мол, оваа есен, по втор пат организира Bikers Moto Show во нашата земја.
Настанот е од отворен карактер и добредојдени се сите љубители на адреналинот, забавата и едукацијата. На настанот ќе се презентираат и најзначајните увозници на мотори, додатоци, аксесоари, акумулатори, филтри, масла и пневматици.
Паралелно, ќе биде истакната и безбедносната опрема, вклучувајќи кациги, заштитни ракавици, јакни, панталони, чизми и штитници. Целта е да се подигне свеста за општата безбедност во сообраќајот.
Во рамки на Bikers Moto Show учество ќе земат и МАМ (Македонска Асоцијација на Мото Клубови), кои ќе презентираат мотори, но и ќе ја оспорат стереотипната перцепција за моторџиите, обраќајќи внимание на важноста на безбедноста.
Мото клубовите ќе покажат како правилно да се подготват моторите за возење, како во град, така и на подолги релации. Додека авто школите ќе ја презентираат потребата од обука за управување со мотоцикли, почитување на сообраќајните правила и стекнување на вистински вештини.
Дел од учесниците ќе бидат и техничките прегледи, чии сообраќајни техничари и инженери ќе делат информации за редовно сервисирање на моторите.
Официјалното отворање е предвидено за на 2 ноември, сабота со почеток од 12 часот, на платото пред главниот влез на Скопје Сити Мол. Во рамки на програмата ќе има и интеракција со посетителите и публиката на теми поврзани со мотокултурата, но и со машкото здравје и важноста на редовните прегледи.
Забавниот дел на настанот ќе вклучува DJ сет, промо штандови од студија за тетовирање и barber shops, со цел да се приближи мото субкултурата до посетителите.
Сите учесници ќе се ангажираат да ја истакнат важноста на редовните здравствени прегледи и превентивната грижа, што е клучно за здравјето на мажите, а за најхрабрите ќе следуваат и награди.